ಮೂತ್ರಪಿಂಡದಲ್ಲಿ ಸದ್ದಿಲ್ಲದೇ ಬೆಳೆಯುತ್ತೆ ಯೂರಿಕ್ ಆಸಿಡ್ ಕಲ್ಲು! ಕಾರಣವೇನು? ಇದಕ್ಕೆ ಪರಿಹಾರವೇನು?

ಯೂರಿಕ್ ಆಸಿಡ್ ಕಲ್ಲುಗಳು ಎಲ್ಲಾ ಮೂತ್ರಪಿಂಡದ ಕಲ್ಲುಗಳ ಪೈಕಿ ಸುಮಾರು 8% - 10% ರಷ್ಟು ಕಾಣಿಸಿಕೊಳ್ಳುತ್ತವೆ. ಹಾಗಾದರೆ ಏನಿದು ಯೂರಿಕ್ ಆಸಿಡ್ ಕಲ್ಲುಗಳು? ಇದಕ್ಕೆ ಕಾರಣವೇನು? ಇದಕ್ಕೆ ಪರಿಹಾರಗಳೇನು?

ಮೂತ್ರಪಿಂಡದ ಕಲ್ಲು ಬೆಳೆಯೋದು ಇದೀಗ ಕಾಮನ್ ಆಗಿದೆ, ಭಾರತದಲ್ಲಿ ಅಷ್ಟೇ ಅಲ್ಲ, ಜಗತ್ತಿನಾದ್ಯಂತ ಹಲವಾರು ಮಂದಿಯನ್ನು ಕಾಡುತ್ತದೆ. ಅದರಲ್ಲಿ ಸಾಮಾನ್ಯವಾಗಿರುವ, ಆದರೆ ಕಡಿಮೆ ಗಮನಕ್ಕೆ ಬರುವ ರೂಪವೇ ಯೂರಿಕ್ ಆಸಿಡ್ ಕಲ್ಲುಗಳು. ಯೂರಿಕ್ ಆಸಿಡ್ ಕಲ್ಲುಗಳು (uric acid stones) ಎಲ್ಲಾ ಮೂತ್ರಪಿಂಡದ ಕಲ್ಲುಗಳ ಪೈಕಿ ಸುಮಾರು 8% - 10% ರಷ್ಟು ಕಾಣಿಸಿಕೊಳ್ಳುತ್ತವೆ. ಹಾಗಾದರೆ ಏನಿದು ಯೂರಿಕ್ ಆಸಿಡ್ ಕಲ್ಲುಗಳು? ಇದಕ್ಕೆ ಕಾರಣವೇನು? ಇದಕ್ಕೆ ಪರಿಹಾರಗಳೇನು? ಇದನ್ನು ತಿಳಿಯಲು ಈ ಲೇಖನ ಓದಿ.

ಯೂರಿಕ್ ಆಸಿಡ್ ಕಲ್ಲುಗಳು ಎಂದರೇನು?

ಯೂರಿಕ್ ಆಸಿಡ್ ಕಲ್ಲುಗಳು, ಮೂತ್ರಪಿಂಡಗಳಲ್ಲಿ ಯೂರಿಕ್ ಆಮ್ಲದ ಅತಿಯಾದ ಸ್ಫಟಿಕೀಕರಣದಿಂದ ಉಂಟಾಗುವ ಗಟ್ಟಿಯಾದ ಕಲ್ಲುಗಳಾಗಿವೆ. ಸಾಮಾನ್ಯವಾಗಿ, ಯೂರಿಕ್ ಆಮ್ಲವು ದೇಹದಲ್ಲಿ ಪ್ಯೂರಿನ್ ಎಂಬ ರಾಸಾಯನಿಕದ ಪಚನದ ಪರಿಣಾಮವಾಗಿ ರೂಪುಗೊಳ್ಳುತ್ತದೆ.

ಈ ಪ್ಯೂರಿನ್‌ಗಳು ಕೆಲ ಆಹಾರಗಳಲ್ಲಿ ಸಹ ಕಾಣಿಸುತ್ತವೆ ಅದರಲ್ಲೂ ಹೆಚ್ಚಾಗಿ ಮಾಂಸಾಹಾರದಲ್ಲಿ ಕಾಣಿಸುತ್ತವೆ. ಸಾಮಾನ್ಯವಾಗಿ ದೇಹ ಈ ಯೂರಿಕ್ ಆಮ್ಲವನ್ನು ಮೂತ್ರದ ಮೂಲಕ ಹೊರಹಾಕುತ್ತದೆ. ಆದರೆ, ಮೂತ್ರ ಆಮ್ಲೀಯ ಸ್ವಭಾವ ಹೊಂದಿದ್ದರೆ ಅಥವಾ ನೀರಿನ ಪ್ರಮಾಣ ಕಡಿಮೆಯಾಗಿದ್ದರೆ, ಆಮ್ಲವು ಕರಗದೇ ಕಲ್ಲುಗಳಾಗಿ ರೂಪುಗೊಳ್ಳುತ್ತದೆ.

ಯೂರಿಕ್ ಆಸಿಡ್ ಕಲ್ಲುಗಳ ಲಕ್ಷಣಗಳು

ಸಣ್ಣ ಯೂರಿಕ್ ಆಸಿಡ್ ಕಲ್ಲುಗಳು ಯಾವುದೇ ಲಕ್ಷಣವಿಲ್ಲದೆ ಹೊರಹೋಗಬಹುದು. ಆದರೆ ದೊಡ್ಡ ಕಲ್ಲುಗಳು ಬಾಧೆಯಾದ ಭಾಗದಲ್ಲಿ ತೀವ್ರವಾದ ನೋವು ಅಥವಾ ಬೇರೆ ಗಂಭೀರ ಸಮಸ್ಯೆಗಳನ್ನುಂಟುಮಾಡಬಹುದು. ಅದರ ಸಾಮಾನ್ಯ ಲಕ್ಷಣಗಳು ಏನು ಅಂದರೆ.

ಬೆನ್ನು ಅಥವಾ ಪಾರ್ಶ್ವ ಭಾಗದಲ್ಲಿ ತೀವ್ರ ನೋವು

ಹೊಟ್ಟೆ ನೋವು ಅಥವಾ ನಿರಂತರ ತೊಂದರೆ

ಮೂತ್ರದಲ್ಲಿ ರಕ್ತ ಕಂಡುಬರುವುದು

ವಾಕರಿಕೆ ಅಥವಾ ವಾಂತಿ

ಜ್ವರ ಮತ್ತು ಚಳಿಯಾಗುವುದು

ದುರ್ವಾಸನೆಯುಳ್ಳ ಮೂತ್ರ ಅಥವಾ ಹಳದಿ ಮೂತ್ರ

ಯೂರಿಕ್ ಆಸಿಡ್ ಕಲ್ಲುಗಳಿಗೆ ಕಾರಣವಾಗುವ ಪ್ರಮುಖ 3 ಅಂಶಗಳು

ಪ್ಯೂರಿನ್ ಅಂಶಗಳು ಹೆಚ್ಚು ಇರುವ ಆಹಾರ ಸೇವನೆ

ಪ್ಯೂರಿನ್‌ಗಳಲ್ಲಿ ಹೆಚ್ಚಿನ ಆಹಾರಗಳು ದೇಹದಲ್ಲಿ ಯೂರಿಕ್ ಆಮ್ಲದ ಪ್ರಮಾಣವನ್ನು ಹೆಚ್ಚಿಸುತ್ತವೆ. ಅವುಗಳೆಂದರೆ…

ಕೆಂಪು ಮಾಂಸ (ದನದ ಮಾಂಸ, ಹಂದಿ ಮಾಂಸ)

ಮೀನು (ಸಾರ್ಡೀನ್, ಟ್ರೌಟ್, ಹೆರಿಂಗ್)

ಯಕೃತ್ತಿನಂತಹ ಅಂಗ ಮಾಂಸಗಳು

ಬಿಯರ್ ಮತ್ತು ಇತರ ಆಲ್ಕೋಹಾಲ್ ಪಾನೀಯಗಳು

ಫ್ರಕ್ಟೋಸ್ ಹೊಂದಿರುವ ಸಿಹಿ ಪಾನೀಯಗಳು

ಈ ಆಹಾರಗಳ ಸೇವನೆಯು ಯೂರಿಕ್ ಆಮ್ಲದ ಪ್ರಮಾಣವನ್ನು ಹೆಚ್ಚಿಸಿ ಕಲ್ಲು ರಚನೆಗೆ ಕಾರಣವಾಗುತ್ತದೆ.

ದೇಹದಲ್ಲಿ ಪ್ಯೂರಿನ್ ಮತ್ತು ಯೂರಿಕ್ ಆಮ್ಲ ಸಂಸ್ಕರಣಾ ತೊಂದರೆ

ಕೆಲವರಿಗೆ ಆನುವಂಶಿಕವಾಗಿ ಪ್ಯೂರಿನ್ ಅಥವಾ ಯೂರಿಕ್ ಆಮ್ಲವನ್ನು ಸರಿಯಾಗಿ ಚಯಾಪಚಯಗೊಳಿಸಲು ದೇಹಕ್ಕೆ ಸಾಧ್ಯವಾಗುವುದಿಲ್ಲ. ಅವುಗಳೆಂದರೆ.

ಗೌಟ್ ಎಂಬ ಸ್ಥಿತಿ ಕಂಡುಬರಬಹುದು

ರಕ್ತದಲ್ಲಿ ಹೆಚ್ಚಿನ ಯೂರಿಕ್ ಆಮ್ಲ ಪ್ರಮಾಣ

ಮಧುಮೇಹ (ಡಯಾಬೀಟಿಸ್) ಇರುವವರು ಹೆಚ್ಚಿನ ಅಪಾಯಕ್ಕೆ ತುತ್ತಾಗಬಹುದು

ಜೀವನಶೈಲಿಯಿಂದ ಉಂಟಾಗುವ ಕಾರಣಗಳು

ಕೆಲವೊಂದು ಜೀವನಶೈಲಿ ಅಂಶಗಳು ಸಹ ಯೂರಿಕ್ ಆಸಿಡ್ ಕಲ್ಲುಗಳಿಗೆ ಕಾರಣವಾಗಬಹುದು. ಅವುಗಳು ಯಾವುದು ಎಂದರೆ…

ನೀರಿನ ಸೇವನೆಯ ಕೊರತೆ

ಅಧಿಕ ತೂಕ

ನಿಯಮಿತ ವ್ಯಾಯಾಮದ ಕೊರತೆ

ನಿರ್ದಿಷ್ಟ ಔಷಧಿಗಳ (ಮೂತ್ರವರ್ಧಕಗಳು, ಇಮ್ಯೂನೋಸಪ್ರೆಸೆಂಟ್‌ಗಳು) ಸೇವನೆ

ತೂಕ ಕಡಿಮೆ ಮಾಡುವ ಶಸ್ತ್ರಚಿಕಿತ್ಸೆ (ಬ್ಯಾರಿಯಾಟ್ರಿಕ್ ಸರ್ಜರಿ)

ಯೂರಿಕ್ ಆಸಿಡ್ ಕಲ್ಲುಗಳು ಕೆಲವೊಮ್ಮೆ ಹೆಚ್ಚಾಗಿ ಬಾಧಿಸದಿದ್ದರೂ, ಕೆಲವು ಸಂದರ್ಭಗಳಲ್ಲಿ ತೀವ್ರ ನೋವು ಹಾಗೂ ಗಂಭೀರ ಸಮಸ್ಯೆಗಳನ್ನುಂಟುಮಾಡಬಹುದು.